ជប៉ុនផ្ដល់ជំនួយសន្តិសុខប្រមាណ៣លានដុល្លារ ដល់កងទ័ពកម្ពុជា
ភ្នំពេញ៖ កម្ពុជា និងជប៉ុន នៅថ្ងៃទី១៩ ខែកក្កដា ឆ្នាំ២០២៦ បានចុះហត្ថលេខាលើគម្រោងជំនួយសន្តិសុខផ្លូវការ OSA តម្លៃ៥០០លានយ៉េន ស្មើប្រមាណ៣លានដុល្លារ ដើម្បីពង្រឹងសមត្ថភាពកងទ័ពកម្ពុជា និងរួមចំណែករក្សាសន្តិភាពនិងស្ថិរភាពក្នុងតំបន់។
ពិធីចុះហត្ថលេខាបានធ្វើឡើងនៅក្រសួងការពារជាតិ ក្នុងជំនួបសម្ដែងការគួរសម និងជម្រាបលារវាងលោកឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ និងលោក UENO Atsushi ឯកអគ្គរាជទូតជប៉ុនប្រចាំកម្ពុជា។
តាមគម្រោងនេះ ជប៉ុននឹងផ្ដល់ឧបករណ៍ទំនាក់ទំនងដល់កងទ័ពជើងគោក និងនាវាល្បាតដល់កងទ័ពជើងទឹកកម្ពុជា។ សម្ភារទាំងនេះនឹងជួយពង្រឹងការទំនាក់ទំនងក្នុងប្រតិបត្តិការ ការល្បាត និងសមត្ថភាពឆ្លើយតបចំពោះបញ្ហាសន្តិសុខ។
ជំនួយ OSA គឺជាក្របខណ្ឌរបស់រដ្ឋាភិបាលជប៉ុន សម្រាប់គាំទ្រឧបករណ៍និងសម្ភារដល់ប្រទេសជាដៃគូ ដើម្បីបង្កើនសមត្ថភាពការពារជាតិ និងរក្សាសណ្ដាប់ធ្នាប់សន្តិសុខអន្តរជាតិ។
កិច្ចព្រមព្រៀងនេះបង្ហាញពីការពង្រីកកិច្ចសហប្រតិបត្តិការការពារជាតិរវាងកម្ពុជា និងជប៉ុន ខណៈប្រទេសទាំងពីរបន្តពង្រឹងទំនាក់ទំនងលើវិស័យសន្តិសុខ ការបណ្ដុះបណ្ដាល និងការរក្សាសន្តិភាព។
