ភ្នំទាំងមូលបាក់សង្កត់ផ្ទះនៅចិន៖ ស្លាប់៨នាក់ បាត់ខ្លួន៣៤នាក់ និងជម្លៀសជាង១ពាន់នាក់
ចិន៖ ក្រុមសង្គ្រោះកំពុងបន្តស្វែងរកមនុស្ស៣៤នាក់ដែលបាត់ខ្លួន បន្ទាប់ពីបាក់ភ្នំដ៏ធំមួយបានសង្កត់អគារលំនៅឋានជាង១០ខ្នង នៅស្រុកស្វយ័ត Pengshui ជាយទីក្រុង Chongqing ភាគនិរតីប្រទេសចិន កាលពីម៉ោង៩ និង០៨នាទីព្រឹក ថ្ងៃទី១៧ ខែកក្កដា ឆ្នាំ២០២៦។
អាជ្ញាធរបញ្ជាក់ថា មនុស្សយ៉ាងហោចណាស់៨នាក់បានស្លាប់ និង១០នាក់ត្រូវបានជួយសង្គ្រោះ។ ក្នុងចំណោមអ្នករួចជីវិត ម្នាក់បានចេញពីមន្ទីរពេទ្យ ខណៈ៩នាក់ទៀតស្ថិតក្នុងស្ថានភាពនឹងនរ។
គ្រោះមហន្តរាយនេះកើតឡើងក្រោយភ្លៀងធ្លាក់ខ្លាំង ធ្វើឱ្យថ្ម និងដីប្រមាណ១៨,០០០ម៉ែត្រគូបបាក់ចុះពីជម្រាលភ្នំក្បែរទន្លេ Wujiang។ ផ្ទាំងថ្មធំបំផុតមួយមានទំហំប្រមាណ៣,០០០ម៉ែត្រគូប ដែលបង្កការលំបាកយ៉ាងខ្លាំងដល់ប្រតិបត្តិការសង្គ្រោះ។
មុនពេលភ្នំបាក់ អ្នកត្រួតពិនិត្យក្នុងសហគមន៍បានឃើញថ្មតូចៗធ្លាក់ និងប្រញាប់ជូនដំណឹង។ ប្រជាពលរដ្ឋជាង៦០នាក់ត្រូវបានជម្លៀសទាន់ពេល ប៉ុន្តែភ្នំបានបាក់ក្នុងពេលកំពុងជម្លៀស ធ្វើឱ្យមនុស្សមួយចំនួនត្រូវកប់ក្រោមគំនរថ្ម។
អាជ្ញាធរបានជម្លៀសប្រជាពលរដ្ឋជាង១,១០០នាក់ចេញពីអគារ២១ខ្នងក្នុងតំបន់ហានិភ័យ។ ក្រុមជំនាញជាង១២០នាក់ រួមជាមួយសត្វឆ្កែសង្គ្រោះ ឧបករណ៍រាវរក និងគ្រឿងចក្រធុនធ្ងន់ កំពុងស្វែងរកអ្នកនៅរស់ ដោយប្រុងប្រយ័ត្នចំពោះការបាក់ភ្នំជាលើកទីពីរ។
