ប៉េកាំង, ថ្ងៃទី១០ ខែកក្កដា ឆ្នាំ២០២៦ – រដ្ឋាភិបាលចិនបានប្រកាសផ្អាកការនាំចេញឧស្ម័ន Helium ជាបណ្តោះអាសន្ន ដោយមានប្រសិទ្ធភាពភ្លាមៗ ខណៈភាពតានតឹងផ្នែកសន្តិសុខ និងជម្លោះនៅតំបន់អាស៊ីខាងលិចបានកើនឡើង ដែលបង្កឱ្យមានការព្រួយបារម្ភជុំវិញស្ថិរភាពនៃខ្សែសង្វាក់ផ្គត់ផ្គង់វត្ថុធាតុដើមសំខាន់ៗនៅលើពិភពលោក។

ការសម្រេចចិត្តនេះត្រូវបានប្រកាសដោយក្រសួងពាណិជ្ជកម្មចិន និងអគ្គរដ្ឋបាលគយចិន ដោយអាជ្ញាធរបានបញ្ជាក់ថា វិធានការនេះមានគោលបំណងធានាការផ្គត់ផ្គង់ Helium សម្រាប់តម្រូវការក្នុងស្រុក ខណៈទីផ្សារអន្តរជាតិកំពុងប្រឈមនឹងភាពមិនច្បាស់លាស់។ ទោះជាយ៉ាងណា ចិនមិនទាន់បញ្ជាក់ថា ការផ្អាកនេះនឹងមានរយៈពេលប៉ុន្មាននោះទេ។Helium គឺជាឧស្ម័នដ៏សំខាន់សម្រាប់ឧស្សាហកម្មបច្ចេកវិទ្យាខ្ពស់ ជាពិសេសការផលិតបន្ទះឈីប (Semiconductors) ដែលត្រូវការវាសម្រាប់ដំណើរការផលិត និងការគ្រប់គ្រងសីតុណ្ហភាព។

លើសពីនេះ វាក៏ត្រូវបានប្រើប្រាស់យ៉ាងទូលំទូលាយក្នុងវិស័យវេជ្ជសាស្ត្រ តាមរយៈម៉ាស៊ីន MRI វិស័យអវកាស ការស្រាវជ្រាវវិទ្យាសាស្ត្រ និងការផលិតឧបករណ៍អេឡិចត្រូនិកទំនើបផងដែរ។អ្នកវិភាគបានអះអាងថា ជម្លោះនៅតំបន់អាស៊ីខាងលិចបានបង្កការរំខានដល់ការដឹកជញ្ជូន និងការផ្គត់ផ្គង់ Helium ពីតំបន់ផលិតសំខាន់ៗ ជាពិសេសប្រទេសកាតា ដែលជាអ្នកផ្គត់ផ្គង់ Helium ដ៏ធំបំផុតមួយរបស់ពិភពលោក។

កត្តានេះបានជំរុញឱ្យចិនចាត់វិធានការប្រុងប្រយ័ត្ន ដើម្បីរក្សាទុកធនធានសម្រាប់ការប្រើប្រាស់ក្នុងស្រុក។បើទោះបីជាចិនមិនមែនជាប្រទេសនាំចេញ Helium ធំបំផុតរបស់ពិភពលោកក៏ដោយ ក៏ការផ្អាកការនាំចេញនេះត្រូវបានគេរំពឹងថា នឹងបង្កើនសម្ពាធលើទីផ្សារពិភពលោក និងអាចធ្វើឱ្យតម្លៃ Helium កើនឡើង ប្រសិនបើវិធានការនេះបន្តអូសបន្លាយ។អ្នកជំនាញក៏បានព្រមានថា ការខ្វះខាត Helium អាចប៉ះពាល់ដល់ការផលិតបន្ទះឈីប ឧបករណ៍វេជ្ជសាស្ត្រ ផលិតផលអេឡិចត្រូនិក និងឧស្សាហកម្មបច្ចេកវិទ្យាខ្ពស់ជាច្រើនទៀត ដែលអាចនាំឱ្យថ្លៃដើមផលិតកម្មកើនឡើង និងបង្កផលប៉ះពាល់ដល់ខ្សែសង្វាក់ផ្គត់ផ្គង់សកលក្នុងរយៈពេលខាងមុខ។

ការសម្រេចចិត្តរបស់ចិនកើតឡើងស្របពេលដែលពិភពលោកកំពុងតាមដានយ៉ាងជិតស្និទ្ធនូវការវិវត្តនៃស្ថានការណ៍នៅអាស៊ីខាងលិច ព្រោះការអូសបន្លាយនៃជម្លោះអាចជះឥទ្ធិពលមិនត្រឹមតែទៅលើទីផ្សារថាមពលប៉ុណ្ណោះទេ ប៉ុន្តែថែមទាំងប៉ះពាល់ដល់ការផ្គត់ផ្គង់វត្ថុធាតុដើមយុទ្ធសាស្ត្រជាច្រើន ដែលជាមូលដ្ឋានសម្រាប់ឧស្សាហកម្មបច្ចេកវិទ្យាទំនើបនៅជុំវិញពិភពលោក។