ប៉េកាំង, ថ្ងៃទី១២ ខែកក្កដា ឆ្នាំ២០២៦ — ព្យុះទីហ្វុង «បាវី» (Bavi) ដែលជាព្យុះខ្លាំងបំផុតមួយវាយប្រហារប្រទេសចិនក្នុងឆ្នាំ២០២៦ បានបោកបក់ចូលឆ្នេរភាគខាងកើតប្រទេសចិន ២ដងជាប់ៗគ្នា កាលពីយប់ថ្ងៃទី ១១ ខែកក្កដា បង្កឱ្យអាជ្ញាធរជម្លៀសប្រជាពលរដ្ឋជិត ២លាននាក់ ជាបន្ទាន់ និងបង្កការរំខានយ៉ាងខ្លាំងដល់ការដឹកជញ្ជូន និងសកម្មភាពសេដ្ឋកិច្ច។បើតាមមជ្ឈមណ្ឌលឧតុនិយមជាតិចិន (National Meteorological Center) ព្យុះទីហ្វុង «បាវី» បានបោកបក់ចូលដីគោកលើកទី១ នៅវេលាម៉ោងប្រហែល ១១:២០ នាទីយប់ (ម៉ោងក្នុងប្រទេសចិន) ក្នុងទីក្រុង Yuhuan ខេត្ត Zhejiang ដោយមានល្បឿនខ្យល់អតិបរមាប្រហែល ១៤៤ គីឡូម៉ែត្រក្នុងមួយម៉ោង។ បន្ទាប់មក ព្យុះបានវាយបោកលើកទី២ នៅក្បែរទីក្រុង Yueqing មុននឹងចុះខ្សោយ និងបន្តផ្លាស់ទីចូលទៅក្នុងដីគោក។មុនពេលព្យុះមកដល់ អាជ្ញាធរចិនបានដាក់ចេញវិធានការបង្ការទ្រង់ទ្រាយធំ ដោយជម្លៀសប្រជាពលរដ្ឋជិត ២លាននាក់ ភាគច្រើននៅខេត្ត Zhejiang ខណៈមនុស្សរាប់សែននាក់ទៀតត្រូវបានជម្លៀសនៅទីក្រុងសៀងហៃ និងខេត្ត Fujian ដើម្បីកាត់បន្ថយហានិភ័យពីខ្យល់កន្ត្រាក់ រលកសមុទ្រខ្ពស់ ទឹកជំនន់ និងរអិលបាក់ដី។ព្យុះនេះបានបង្កឱ្យដើមឈើជាង ១,៣០០ដើម ដួលរលំ ផ្លូវជាច្រើនត្រូវទឹកជន់លិច និងមានការរអិលបាក់ដីនៅតំបន់ភ្នំ។ ជើងហោះហើររាប់រយជើង រថភ្លើងល្បឿនលឿន សេវាសាឡាង និងសកម្មភាពកំពង់ផែមួយចំនួនត្រូវបានផ្អាក ខណៈក្រុមសង្គ្រោះបន្ទាន់បានប្រើគ្រឿងចក្រធុនធ្ងន់ និងម៉ាស៊ីនកាត់ឈើ ដើម្បីសម្អាតផ្លូវ និងជួយប្រជាពលរដ្ឋដែលរងផលប៉ះពាល់។គិតត្រឹមថ្ងៃទី១២ ខែកក្កដា ព្យុះ «បាវី» បានចុះខ្សោយទៅជាព្យុះត្រូពិច ប៉ុន្តែមជ្ឈមណ្ឌលឧតុនិយមចិននៅតែព្រមានថា ភ្លៀងធ្លាក់ខ្លាំង និងខ្យល់បក់ខ្លាំងអាចបន្តគ្របដណ្តប់តំបន់ភាគខាងកើត និងភាគខាងជើងប្រទេសចិនក្នុងរយៈពេលប៉ុន្មានថ្ងៃខាងមុខ។