មនុស្សយ៉ាងហោចណាស់ ២០នាក់ស្លាប់ ជាង ១០០នាក់បាត់ខ្លួន ក្រោយទឹកជំនន់ភ្លាមៗវាយប្រហារខេត្ត Nuristan ប្រទេសអាហ្វហ្គានីស្ថាន
អាហ្វហ្គានីស្ថាន៖ យ៉ាងហោចណាស់មនុស្ស ២០នាក់បានស្លាប់, ជាង ៨០នាក់រងរបួស និង ជាង ១០០នាក់កំពុងបាត់ខ្លួន បន្ទាប់ពីទឹកជំនន់ភ្លាមៗបានវាយប្រហារក្រុង Parun ដែលជាទីរួមខេត្ត Nuristan ភាគខាងកើតប្រទេសអាហ្វហ្គានីស្ថាន កាលពីថ្ងៃទី ២០ ខែកក្កដា ឆ្នាំ២០២៦។
អាជ្ញាធរគ្រប់គ្រងគ្រោះមហន្តរាយជាតិអាហ្វហ្គានីស្ថាន (ANDMA) បានបញ្ជាក់ថា ភ្លៀងធ្លាក់យ៉ាងខ្លាំងបានបង្កឱ្យមានទឹកជំនន់ភ្លាមៗ ហូរចូលតំបន់លំនៅឋាន និងផ្សារនៅក្រុង Parun ក្នុងរយៈពេលដ៏ខ្លី បណ្ដាលឱ្យមានការខូចខាតធ្ងន់ធ្ងរដល់ផ្ទះសម្បែង ដីកសិកម្ម ផ្លូវថ្នល់ និងហេដ្ឋារចនាសម្ព័ន្ធសាធារណៈ។
មន្ត្រីក្នុងតំបន់បានឱ្យដឹងថា មនុស្សជាច្រើនត្រូវបានទឹកហូរគួចបាត់ ខណៈអភិបាលក្រុង Parun និងមន្ត្រីមូលដ្ឋានមួយចំនួនក៏ស្ថិតក្នុងចំណោមអ្នកបាត់ខ្លួនផងដែរ។ ក្រុមសង្គ្រោះកំពុងបន្តស្វែងរកអ្នករស់រានមានជីវិត និងស្រង់សាកសពនៅតំបន់រងគ្រោះ ប៉ុន្តែការងារជួបការលំបាកដោយសារភូមិសាស្ត្រភ្នំ និងផ្លូវជាច្រើនត្រូវបានកាត់ផ្តាច់។
អាជ្ញាធរបានអំពាវនាវឱ្យប្រជាពលរដ្ឋជៀសវាងតំបន់ប្រឈមនឹងទឹកជំនន់ ខណៈការព្យាករអាកាសធាតុបង្ហាញថា អាចមានភ្លៀងធ្លាក់ខ្លាំងបន្ថែមទៀតនៅក្នុងខេត្ត និងតំបន់ជិតខាង។ អាជ្ញាធរក៏បានបញ្ជាក់ថា តួលេខអ្នកស្លាប់ អ្នករបួស និងអ្នកបាត់ខ្លួននៅពេលនេះ គ្រាន់តែជាតួលេខបឋម ហើយអាចកើនឡើង ខណៈប្រតិបត្តិការស្វែងរក និងវាយតម្លៃការខូចខាតនៅតែបន្ត។
