អគ្គិភ័យព្រៃដ៏សន្ធោសន្ធៅ វាយលុកក្រុង Castronovo di Sicilia អ៊ីតាលី បង្ខំឱ្យអាជ្ញាធរជម្លៀសប្រជាពលរដ្ឋ
អ៊ីតាលី៖ អាជ្ញាធរនៅក្រុង Castronovo di Sicilia ខេត្ត Palermo លើកោះ Sicily ប្រទេសអ៊ីតាលី បានប្រកាសដាក់តំបន់ក្នុងស្ថានភាពអាសន្ន បន្ទាប់ពីអគ្គិភ័យព្រៃដ៏ធំបានឆាបឆេះរាលដាលយ៉ាងឆាប់រហ័ស កាលពីថ្ងៃទី២០ ខែកក្កដា ឆ្នាំ២០២៦។
អណ្តាតភ្លើងដែលបង្កឡើងដោយអាកាសធាតុក្តៅខ្លាំង និងខ្យល់បក់ខ្លាំង បានរាលដាលពីជម្រាលភ្នំចូលជិតតំបន់លំនៅឋាន បង្កឱ្យផ្សែងខ្មៅគ្របដណ្តប់ទីក្រុង និងបង្ខំឱ្យអាជ្ញាធរជម្លៀសប្រជាពលរដ្ឋចេញពីផ្ទះមួយចំនួនជាបន្ទាន់ ដើម្បីការពារសុវត្ថិភាព។
អភិបាលក្រុង Vitale Gattuso បានថ្លែងថា សហគមន៍កំពុងប្រឈមនឹង «ភាពអាសន្នពេញលេញ» និងបានអំពាវនាវឱ្យមានការបញ្ជូនកម្លាំង និងមធ្យោបាយបន្ថែម ដើម្បីទប់ស្កាត់ការរាលដាលនៃអគ្គិភ័យ។
ក្រុមពន្លត់អគ្គិភ័យ កងការពារព្រៃឈើ កងការពារស៊ីវិល រួមទាំងយន្តហោះ Canadair និងឧទ្ធម្ភាគចក្រ ត្រូវបានដាក់ពង្រាយទៅកាន់តំបន់រងគ្រោះ ដើម្បីការពារលំនៅឋាន និងគ្រប់គ្រងស្ថានការណ៍។ អគ្គិភ័យក៏បានបង្កការខូចខាតដល់ដំណាំ កសិដ្ឋាន និងប្រព័ន្ធផ្គត់ផ្គង់ទឹកស្អាតនៅតំបន់មួយចំនួនផងដែរ។
គិតត្រឹមពេលនេះ អាជ្ញាធរមិនទាន់ប្រកាសពីអ្នកស្លាប់នៅឡើយទេ ខណៈប្រតិបត្តិការពន្លត់ភ្លើង និងជម្លៀសប្រជាពលរដ្ឋនៅតែបន្ត ដោយសារអាកាសធាតុក្តៅ និងខ្យល់ខ្លាំងនៅតែជំរុញឱ្យភ្លើងរាលដាលបន្ថែម។
