តេអេរ៉ង់៖ ទីប្រឹក្សាយោធាជាន់ខ្ពស់របស់មេដឹកនាំកំពូលអ៊ីរ៉ង់ លោក Mohsen Rezaei បានព្រមានថា អ៊ីរ៉ង់នឹងផ្លាស់ប្ដូរយុទ្ធសាស្ត្រពីការការពារទៅជាប្រតិបត្តិការវាយប្រហារទ្រង់ទ្រាយធំ ប្រសិនបើសហរដ្ឋអាមេរិកនៅតែបន្តការវាយប្រហារក្នុងរយៈពេល ២ ទៅ ៣ ថ្ងៃខាងមុខ។

លោក Mohsen Rezaei បានអះអាងថា អ៊ីរ៉ង់រហូតមកដល់ពេលនេះនៅតែអនុវត្តវិធានការការពារជាចម្បង ប៉ុន្តែប្រសិនបើការវាយប្រហារពីសហរដ្ឋអាមេរិកនៅតែបន្ត នោះទីក្រុងតេអេរ៉ង់នឹងឆ្លើយតបដោយការវាយប្រហារកាន់តែខ្លាំង និងទូលំទូលាយជាងមុន។

ការព្រមាននេះកើតឡើង ខណៈជម្លោះរវាងអ៊ីរ៉ង់ និងសហរដ្ឋអាមេរិកកំពុងបន្តកើនឡើង ដោយភាគីទាំងពីរបានបន្តការវាយប្រហារ និងឆ្លើយតបគ្នាទៅវិញទៅមក ដែលធ្វើឱ្យស្ថានភាពសន្តិសុខនៅមជ្ឈិមបូព៌ាកាន់តែតានតឹង និងបង្កការព្រួយបារម្ភពីការរីករាលដាលនៃជម្លោះទៅកាន់តំបន់ជុំវិញ។

អ្នកវិភាគអន្តរជាតិបានវាយតម្លៃថា រយៈពេលប៉ុន្មានថ្ងៃខាងមុខអាចក្លាយជាចំណុចសម្រេចថា ភាគីទាំងពីរនឹងឈានទៅរកការបន្ធូរបន្ថយភាពតានតឹង ឬក៏ការប្រឈមមុខផ្នែកយោធាកាន់តែធ្ងន់ធ្ងរ ដែលអាចប៉ះពាល់ដល់សន្តិសុខ និងសេដ្ឋកិច្ចពិភពលោក ជាពិសេសទីផ្សារថាមពល។