ថៃបន្តសាងសង់របងព្រំដែនជាប់កម្ពុជា ខណៈកម្ពុជាតវ៉ាថាជាសកម្មភាពឯកតោភាគី
អាជ្ញាធរ និងកងទ័ពថៃ បានបន្តអនុវត្តគម្រោងសាងសង់របងព្រំដែនអចិន្ត្រៃយ៍តាមបណ្តោយព្រំដែនកម្ពុជា-ថៃ ដោយដំណាក់កាលដំបូងត្រូវបានសាងសង់នៅតំបន់ស្រុក Pong Nam Ron ខេត្តចាន់ថាបុរី ប្រទេសថៃ។ បើតាមការបញ្ជាក់របស់ភាគីថៃ របងនេះត្រូវបានសាងសង់ឡើងក្នុងគោលបំណងពង្រឹងសន្តិសុខ និងទប់ស្កាត់ការឆ្លងដែនដោយខុសច្បាប់។
របាយការណ៍បានឱ្យដឹងថា ដំណាក់កាលទី១ មានប្រវែងប្រមាណ ១,៣គីឡូម៉ែត្រ ដោយប្រើបន្ទះបេតុងពង្រឹង សំណាញ់ដែក និងលួសបន្លា ហើយថៃគ្រោងពង្រីកការសាងសង់បន្ថែមនៅតំបន់ផ្សេងទៀតតាមបណ្តោយព្រំដែន។ការសាងសង់នេះកើតឡើងក្រោយពីមានភាពតានតឹងនៅតាមព្រំដែនកម្ពុជា-ថៃ កាលពីឆ្នាំ២០២៥ ដែលបណ្តាលឱ្យមានការប៉ះទង្គិចរវាងកងកម្លាំងនៃប្រទេសទាំងពីរ មុនពេលឈានដល់បទឈប់បាញ់ និងបន្តដោះស្រាយបញ្ហាតាមយន្តការទ្វេភាគី។
ជុំវិញបញ្ហានេះ រាជរដ្ឋាភិបាលកម្ពុជា បានបន្តដាក់កំណត់ទូតតវ៉ាទៅកាន់ភាគីថៃ ដោយអះអាងថា ការសាងសង់របង ការដាក់លួសបន្លា និងសកម្មភាពផ្សេងៗនៅតាមតំបន់ព្រំដែន ដែលធ្វើឡើងដោយគ្មានការឯកភាពពីភាគីទាំងពីរ គឺជា សកម្មភាពឯកតោភាគី ដែលផ្ទុយនឹងស្មារតីនៃអនុស្សរណៈយោគយល់ (MOU) ឆ្នាំ២០០០ ស្តីពីការវាស់វែង និងកំណត់ព្រំដែន។ កម្ពុជាក៏បានទាមទារឱ្យភាគីថៃបញ្ឈប់សកម្មភាពទាំងនេះ និងដោះស្រាយបញ្ហាតាមយន្តការរួមដែលមានស្រាប់។
ភាគីកម្ពុជា បានបញ្ជាក់ជាថ្មីថា បញ្ហាព្រំដែនរវាងប្រទេសទាំងពីរ គួរតែត្រូវបានដោះស្រាយដោយសន្តិវិធី តាមរយៈកិច្ចពិភាក្សា និងការគោរពកិច្ចព្រមព្រៀងដែលមានស្រាប់ ដើម្បីរក្សាសន្តិភាព ស្ថិរភាព និងទំនាក់ទំនងល្អរវាងប្រទេសជិតខាង។បច្ចុប្បន្ន ភាគីថៃនៅតែបន្តគម្រោងសាងសង់របងព្រំដែន ខណៈភាគីកម្ពុជា បន្តតាមដានស្ថានការណ៍ និងរក្សាជំហរតវ៉ាតាមផ្លូវការទូត ចំពោះសកម្មភាពដែលខ្លួនចាត់ទុកថាជាការអនុវត្តដោយឯកតោភាគី។
