ប្រទេសជប៉ុនត្រូវបានរំពឹងថា នឹងចាប់ផ្តើមដាក់ឲ្យប្រើប្រាស់ប្រព័ន្ធមីស៊ីលចម្ងាយឆ្ងាយដែលបានអភិវឌ្ឍដោយខ្លួនឯង ដែលជាជំហានសំខាន់មួយបង្ហាញពីការផ្លាស់ប្តូរយុទ្ធសាស្ត្រការពារជាតិរបស់ខ្លួនទៅរកសមត្ថភាព “counterstrike” ឬការវាយតបត្រឡប់ទៅលើគោលដៅសត្រូវ ប្រសិនបើមានការគំរាមកំហែង។យោងតាមអ្នកវិភាគផ្នែកសន្តិសុខ ការដាក់ប្រើប្រព័ន្ធមីស៊ីលថ្មីនេះ នឹងធ្វើឱ្យកងកម្លាំងការពារខ្លួនជប៉ុន (JSDF) មានសមត្ថភាពវាយប្រហារទៅលើគោលដៅនៅចម្ងាយឆ្ងាយជាងមុន ជាពិសេសក្នុងករណីដែលប្រទេសនេះត្រូវប្រឈមមុខនឹងការគំរាមកំហែងផ្នែកសន្តិសុខនៅក្នុងតំបន់។ប្រព័ន្ធមីស៊ីលដែលកំពុងត្រូវបានអភិវឌ្ឍនោះ គឺជាការធ្វើឱ្យប្រសើរឡើងនៃប្រព័ន្ធមីស៊ីលការពារឆ្នេរសមុទ្រ ដែលអាចបាញ់បានចម្ងាយឆ្ងាយ និងមានភាពត្រឹមត្រូវខ្ពស់។ ជាមួយនឹងនេះ ជប៉ុនក៏កំពុងពង្រឹងសមត្ថភាពប្រមូលព័ត៌មាន ដូចជា ប្រព័ន្ធស៊ើបអង្កេត ផ្កាយរណប និងប្រព័ន្ធតាមដានផ្សេងៗ ដើម្បីគាំទ្រដល់ការប្រើប្រាស់សមត្ថភាពវាយប្រហារថ្មី។ការផ្លាស់ប្តូរនេះត្រូវបានគេចាត់ទុកថា ជាជំហានសំខាន់មួយក្នុងយុទ្ធសាស្ត្រការពារជាតិថ្មីរបស់ជប៉ុន ដែលមានគោលបំណងបង្កើនសមត្ថភាពការពារខ្លួន និងទប់ស្កាត់ការគំរាមកំហែងនៅក្នុងតំបន់អាស៊ីប៉ាស៊ីហ្វិក។ ទន្ទឹមនឹងនេះ ការអភិវឌ្ឍសមត្ថភាពវាយតបត្រឡប់ក៏ត្រូវបានគេមើលថា ជាផ្នែកមួយនៃកិច្ចសហការសន្តិសុខជាមួយសម្ព័ន្ធមិត្ត ដើម្បីរក្សាស្ថិរភាពក្នុងតំបន់។